CNN-ის ცნობით, ალან ტურინგთან ერთად, ფიზიკოს სტეფან ჰოკინგისა და მათემატიკოს ადა ლოველასის კანდიდატურებს განიხილავდნენ. თუმცა, საბოლოოდ, Bank of England-ის გადაწყვეტილებით, £50-იანზე ალან ტურინგის გამოსახულებას დაიტანენ. „ალან ტურინგი კომპიუტერული მეცნიერებისა და ხელოვნური ინტელექტის მამა იყო. ასევე, ომის ერთ-ერთი გმირი. მისი წვლილი, ჩვენი ქვეყნის ისტორიაში, ძალიან მნიშვნელოვანია, ის გიგანტია, რომლის მხრებზეც ვდგავართ“, – აღნიშნა „ინგლისის ბანკის“ [ Bank of England] მმართველმა მარკ კარნიმ. ახალი £50-იანი კუპიურა, მიმოქცევაში, 2021 წლის ბოლოს გამოვა. ალან მეთისონ ტიურინგი — ინგლისელი მათემატიკოსი, ლოგიკოსი, კრიპტოანალიტიკოსი და კომპიუტერული მეცნიერების დარგის მოღვაწე . კომპიუტერული მეცნიერების შექმნა და ჩამოყალიბება, ალგორითმების ძირითადი კონცეფციების ფორმალიზაცია, გამოთვლები ტიურინგის მანქანით და თანამედროვე კომპიუტერის შექმნაში უმნიშვნელოვანესი წვლილი - ეს არის ალან ტიურინგის ნაშრომთა არასრული ჩამონათვალი. II მსოფლიო ომის პერიოდში ტიურინგი მუშაობდა დიდი ბრიტანეთის სახელმწიფო კრიპტოანალიკურ ცენტრში (Government Code and Cypher School at Bletchley Park). ამ დროისათვის იგი ხელმძღვანელობდა განყოფილება Hut 8-ს, რომელიც პასუხისმგებელი იყო გერმანული წყალქვეშა ნავების შიფროგრამების ანალიზზე. შეიმუშავა ამ შიფროგრამების კრიპტოანალიზის რიგი აპარატული საშუალებები, მათ შორის ე.წ. Bombe, ელექტრომექანიკური მანქანა, რომელსაც შეეძლო გერმანული შიფრაციის აპარატის ენიგმას შიფრაციის პარამეტრების გამოთვლა. ომის შემდგომ წლებში მუშაობდა ფიზიკის ეროვნულ ლაბორატორიაში, სადაც შექმნა თანამედროვე კომპიუტერის პირველი პროტოტიპის (ACE) არქიტექტურული დიზაინი. სიცოცხლის ბოლო წლებში ტიურინგი დაინტერესდა მათემატიკური ბიოლოგიით. დაწერა ნაშრომი მორფოგენეზისის ქიმიურ საწყისებზე, და იწინასწარმეტყველა ცვალებადი ქიმიური რეაქციების არსებობა (მაგ. ბელოუსოვ-ჟაბოტინსკის რეაქცია, რომელიც პირველად აღწერილ იქნა 1960-იან წლებში).